ગુજરાતના 20 ધારાસભ્યોના ‘પદ’ જોખમમાં

  • ગુજરાતના 20 ધારાસભ્યોના ‘પદ’ જોખમમાં
    ગુજરાતના 20 ધારાસભ્યોના ‘પદ’ જોખમમાં

પબુભા માણેક (દ્વારકા)ની જેમ ભાજપનાં અન્ય 16 ધારાસભ્યો સામે પણ કાયદાકીય લડત ચાલે છે
 આવી પળોજણમાં કોંગ્રેસના પણ 4 ધારાસભ્યો ફસાયેલા છે, કોર્ટના વલણ પર સૌની મીટ   રાજકોટ તા.13
ભાજપ અને કોંગ્રેસ વચ્ચે લોકસભા ચૂંટણીમાં સામસામી લડાઈ ચાલી જ રહી છે, પરંતુ તે સિવાય 2017માં થયેલી વિધાનસભા ચૂંટણી મામલે પણ બંને પક્ષો કોર્ટમાં લડી રહ્યા છે. હજુ ગઈકાલે જ દ્વારકા વિધાનસભા બેઠકની ચૂંટણી હાઈકોર્ટે રદ્દ કરતા આ બેઠક પરથી ચૂંટાયેલા ભાજપના ધારાસભ્ય પબુભા માણેકને બેઠક ગુમાવવાનો વારો આવ્યો છે. દ્વારકા સિવાય બીજી 16 બેઠકો પર પણ કાયદાકીય લડાઈ ચાલી રહી છે, જેમાં ભાજપના 16 અને કોંગ્રેસના 4 ધારાસભ્યો પર તલવાર લટકી 
રહી છે. 2018માં ગુજરાત હાઈકોર્ટમાં વિધાનસભા ચૂંટણીના મામલે 24 પિટિશનો થઈ હતી, જેમાંથી 17 ભાજપના જ્યારે ચાર કોંગ્રેસના ધારાસભ્યોો સામે થઈ છે. બાકીની પિટિશનોને પરત લઈ લેવામાં આવી હતી. પબુભા માણેકની જીત સામે થયેલી પિટિશન પર ચુકાદો આવી ગયો છે, ત્યારે તેમના પછી ભાજપના સૌથી સિનિયર નેતા ગણાતા ભૂપેન્દ્રસિંહ ચુડાસમાની ધોળકા બેઠક પર થયેલી જીતને પડકારતી પિટિશન પર ચુકાદો ગમે ત્યારે આવી શકે છે.
ભૂપેન્દ્રસિંહ ચુડાસમા ધોળકા બેઠક પરથી માંડ 327 મતોથી જીત્યા છે. તેમની જીતને કોંગ્રેસના ઉમેદવાર અશ્વિન રાઠોડ દ્વારા પડકારવામાં આવી છે. ગુજરાત હાઈકોર્ટે પણ આ કેસની સુનાવણીમાં મત ગણતરીમાં ચૂંટણી પંચના નિયમોનો ભંગ થયો હોવાનું નોંધીને રાજસ્થાન કેડરના આઈએએસ વિનિતા બોહરા તેમજ ધોળકા બેઠકના રિટર્નિંગ ઓફિસર ધવલ જાની અને ચૂંટણી પંચ પાસે જવાબ માગ્યો છે. કોંગ્રેસના ઉમેદવારનો આક્ષેપ છે કે ધોળકા બેઠક પર પોસ્ટલ બેલેટથી આવેલા મતોની ગણતરીમાં ગેરરીતિ થઈ છે.
ઊર્જા મંત્રી સૌરભ પટેલ બોટાદ બેઠકથી માંડ 906 મતોથી જીત્યા હતા. તેમની જીતને કોંગ્રેસના ઉમેદવાર ડીએમ પટેલે હાઈકોર્ટમાં પડકારી છે. અરજકર્તાનો આક્ષેપ છે કે રિટર્નિંગ ઓફિસરે મત ગણતરીમાં ગેરરીતિ આચરી છે. આ પિટિશન હાલ પેન્ડિંગ છે અને એપ્રિલ મહિનાના છેલ્લા અઠવાડિયામાં સુનાવણી પર આવે તેવી શક્યતા છે. ડીએમ પટેલે મિરર સાથે વાત કરતા જણાવ્યું હતું કે, બોટાદ બેઠકની મત ગણતરીમાં નિયમોનો ભંગ થયો છે. તેમણે પોતાની પિટિશનમાં અનેક મુદ્દા ઉઠાવ્યા છે, અને સીસીટીવી ફુટેજ પણ કોર્ટ સમક્ષ રજૂ કર્યા છે.
ભાજપના એમએલએ બાબુ બોખિરિયાની પોરબંદર બેઠક પર થયેલી જીતને કોંગ્રેસના નેતા અર્જુન મોઢવાડિયાએ કોર્ટમાં પડકારી છે. બોખિરિયા આ ચૂંટણી 1855 મતોથી જીત્યા હતા. મોઢવાડિયાએ ઈવીએમમાં પડેલા વોટની ગણતરી પર શંકા વ્યક્ત કરી વીવીપેટ સ્લીપની ગણતરી કરવા માગ કરી હતી. જોકે,ટેકનિકલ ગ્રાઉન્ડ પર તેમની પિટિશન પર સુનાવણી નથી થઈ રહી.
સુરતની લિંબાયત બેઠક પરથી બીજી વાર ચૂંટાયેલા ભાજપના ઉમેદવાર સંગીતા પાટીલ અને વરાછા બેઠકના ધારાસભ્ય કિશોર કાનાણી સામે પણ હાઈકોર્ટમાં પિટિશન થઈ છે. પૂર્વ આઈપીએસ ઓફિસર અને હવે વકીલાતની પ્રેક્ટિસ કરી રહેલા રાહુલ શર્મા મારફતે કોંગ્રેસના ઉમેદવારોએ 10 જેટલી પિટિશનો ફાઈલ કરી છે. કોંગ્રેસના નેતા સિદ્ધાર્થ પટેલે પણ ડભોઈ બેઠકના પરિણામને કોર્ટમાં પડકારતા ભાજપના શૈલેષ મહેતા સામે પિટિશન કરી છે. કોંગ્રેસમાંથી ભાજપમાં ગયેલા સીકે રાઉલજી સામે પણ કોંગ્રેસના ઉમેદવાર રાજેન્દ્ર પરમારે પિટિશન કરી છે.