સચિન તેંડુલકરના પુત્ર અર્જુન તેંડુલકર લગ્નના બંધનમાં બંધાઈ ગયા છે. અર્જુને 5 માર્ચે મુંબઈમાં સાનિયા ચંડોક સાથે લગ્ન કર્યા હતા. આ લગ્નમાં ક્રિકેટ જગતની સાથે ફિલ્મ જગતની હસ્તીઓ પણ હાજર રહી હતી. હવે, આ લગ્નની તસવીરો અને વીડિયો સોશિયલ મીડિયા પર વાયરલ થઈ રહ્યા છે, જેમાં સચિન તેંડુલકર અને તેની પત્ની અંજલિ તેમના પુત્ર અને પુત્રવધૂને આશીર્વાદ આપતા જોવા મળી રહ્યા છે. ઘણા ભૂતપૂર્વ ક્રિકેટરોએ અર્જુનના લગ્નની તસવીરો સોશિયલ મીડિયા પર શેર કરી છે અને તેને લગ્ન માટે અભિનંદન આપ્યા છે.
ભૂતપૂર્વ ભારતીય ક્રિકેટર અને કોમેન્ટેટર આકાશ ચોપરાએ અર્જુન તેંડુલકર સાથેનો પોતાનો એક ફોટો શેર કર્યો અને લખ્યું, “અર્જુન તેંડુલકરને ખુશીઓ અને આનંદથી ભરેલું જીવન મળે તેવી શુભેચ્છા. સચિન તેંડુલકર અને તેના સમગ્ર પરિવારને અભિનંદન.” આકાશ ચોપરા દ્વારા શેર કરાયેલા અર્જુનના લગ્નના ફોટામાં સચિન તેંડુલકર ઉપરાંત, સુરેશ રૈના અને તેની પત્ની પણ જોવા મળે છે. રૈના અને આકાશ ચોપરા ઉપરાંત, ભૂતપૂર્વ ભારતીય કેપ્ટન રાહુલ દ્રવિડ તેની પત્ની સાથે અર્જુન તેંડુલકરના લગ્નમાં હાજરી આપી હતી.
નોંધનીય છે કે અર્જુન તેંડુલકર અને સાનિયા ચાંડોક લાંબા સમયથી પારિવારિક સંબંધો ધરાવે છે. તેમના પરિવારો એકબીજાને વર્ષોથી ઓળખે છે, અને સચિન તેંડુલકર સાનિયાના દાદા રવિ ઘાઈને દાયકાઓથી ઓળખતા હતા. જ્યારે અર્જુન ક્રિકેટમાં કારકિર્દી બનાવી રહ્યો છે, ત્યારે સાનિયા એક ઉદ્યોગસાહસિક છે અને એક સફળ પેટ સ્પા ચેઇન ચલાવે છે.
એવું માનવામાં આવે છે કે બંનેનો પરિચય અર્જુનની બહેન સારા તેંડુલકર દ્વારા કરાવવામાં આવ્યો હતો, જે ઘણીવાર તેની નજીકની મિત્ર સાનિયાને જીમ સત્રો, બ્રંચ અને વેકેશનમાં સાથે લાવતી હતી. ઓળખાણ તરીકે શરૂ થયેલી વાત ધીમે ધીમે મિત્રતા અને પછી સંબંધમાં પરિણમી. બાદમાં બંનેએ 13 ઓગસ્ટ, 2025 ના રોજ મુંબઈમાં એક ખાનગી સમારંભમાં સગાઈ કરી, જેમાં ફક્ત નજીકના પરિવાર અને થોડા મિત્રો જ હાજર રહ્યા હતા. સચિને રેડિટ પર એક પ્રશ્નમાં તેની પુષ્ટિ કરી ત્યારે સગાઈના સમાચાર મહિનાઓ પછી જાહેર થયા.
