ફાઇનલમાં હાર બાદ હોટલ પરત ફરતી વખતે બની ઘટના રસ્તા પર બેઠેલી ટીમ માટે વૈકલ્પીક વ્યવસ્થા કરવી પડી
આઇપીએલ ર0ર6ની ફાઇનલ મેચમાં હાર બાદ ગુજરાત ટાઇટન્સની ટીમને પડયા પર પાટુ જેવો અનુભવ થયો હતો. હોટેલ પરત ફરતી વખતે તેમની બસમાં આગ લાગી હતી. જો કે તમામ ખેલાડીઓનો બચાવ થયો હતો. રસતા પર બેઠેલી ટીમો માટે વૈકલ્પીક વ્યવસ્થા કરવી પડી હતી.
ઇન્ડિયન પ્રીમિયર લીગ 2026 ની ફાઇનલ મેચ બાદ રવિવારે મોડી રાત્રે અમદાવાદમાં એક મોટી અને આઘાતજનક દુર્ઘટના સામે આવી છે. રોયલ ચેલેન્જર્સ બેંગલુરુ સામે ફાઇનલ મુકાબલામાં હારનો સામનો કર્યા બાદ હોટેલ પરત ફરી રહેલી ગુજરાત ટાઇટન્સની ટીમ બસમાં અચાનક ભયાનક આગ ફાટી નીકળી હતી. પ્રાથમિક અહેવાલો અનુસાર, બસના વાયરિંગમાં થયેલા શોર્ટ સર્કિટના કારણે આ આગ લાગી હોવાનું બહાર આવ્યું છે. જોકે, સદનસીબે આ ઘટનામાં કોઈ મોટી જાનહાનિ કે ગંભીર નુકસાન થયું નથી અને સમયસૂચકતા વાપરીને તમામ ખેલાડીઓ તથા સપોર્ટ સ્ટાફને સુરક્ષિત રીતે બહાર કાઢી લેવામાં આવ્યા હતા. આ અકસ્માતને કારણે હારથી નિરાશ થયેલા ગુજરાત ટાઇટન્સના ખેલાડીઓ રસ્તા પર અંદાજે એક કલાક સુધી ફસાયેલા રહ્યા હતા. મેચ સમાપ્ત થયા બાદ જ્યારે ગુજરાત ટાઇટન્સની આખી ટીમ સવાર થઈને સ્ટેડિયમથી પોતાની નિર્ધારિત હોટેલ તરફ પરત ફરી રહી હતી, ત્યારે અચાનક ચાલુ બસમાં શોર્ટ સર્કિટ થયું હતું અને જોતજોતામાં ધુમાડાના ગોટેગોટા નીકળવા લાગ્યા હતા. પરિસ્થિતિ વધુ ગંભીર બને તે પહેલા જ બસના ડ્રાઇવર અને સુરક્ષાકર્મીઓએ વાહનને રોકી દીધું હતું અને તાત્કાલિક તમામ ક્રિકેટરોને બહાર કાઢ્યા હતા. ખેલાડીઓ સુરક્ષિત હોવાની પુષ્ટિ થતાં જ ફ્રેન્ચાઇઝી અને ક્રિકેટ ચાહકોએ રાહતનો શ્ર્વાસ લીધો હતો. આ ઘટનાએ ફાઇનલમાં હારના ગમમાં ડૂબેલી ગુજરાતની ટીમની મુશ્કેલીઓમાં ક્ષણિક વધારો કર્યો હતો. આ ઘટના પછી, આખી ટીમ થોડા સમય માટે રસ્તાની બાજુમાં રાહ જોઈ. આખરે, ખેલાડીઓ અને સપોર્ટ સ્ટાફને તેમની હોટેલમાં લઈ જવા માટે એક રિપ્લેસમેન્ટ બસની વ્યવસ્થા કરવામાંઆવી. આમ, ટીમ બસમાં ટેકનિકલ ખામીને કારણે ફાઇનલમાં મળેલી હારથી ગુજરાત ટાઇટન્સ માટે લાંબા અને કઠિન અભિયાનનો નિરાશાજનક અંત આવ્યો, જે મુશ્ર્કેલીઓથી ભરપૂર હતું. જોકે, સૌથી મોટી રાહત એ હતી કે, બસમાં ધુમાડો ભરાઈ ગયો હોવા છતાં, બધા ખેલાડીઓ અને સ્ટાફ સંપૂર્ણપણે સુરક્ષિત રહ્યા.
