કાલાવડ-લાલપુરમાં પવનચક્કીના વાયરની ચોરી કરનાર ચાર ઝડપાયા

પોલીસે રૂા. 1.06 લાખનો મુદ્દામાલ કબ્જે કરી ફરાર આરોપીની શોધખોળ હાથ ધરી

જામનગર ની એલસીબી એ કાલાવડ અને લાલપુર તાલુકામાં પવનચક્કીના ટાવરમાંથી અર્થીંગ માટેના કોપર કેબલ વાયરની ચોરીના ગુનાઓનો ભેદ ઉકેલી ચાર આરોપીઓને ઝડપી પાડ્યા છે. પોલીસે તેમની પાસેથી કુલ રૂ. 1,06,510નો મુદ્દામાલ કબજે કર્યો છે, જ્યારે એક આરોપી હજુ ફરાર છે. પવનચક્કી ટાવર પર થઈ રહેલી કોપર કેબલ ચોરીઓનો ભેદ ઉકેલવા માં પોલીસ ને સફળતા મળી છે. ટેકનિકલ સર્વેલન્સ અને બાતમીના આધારે પોલીસે જામનગર તાલુકાના દરેડ જીઆઇડીસીમાં આવેલા કારખાનામાં દરોડો પાડી આરોપીઓને ઝડપી પાડ્યા હતા.
પકડાયેલા આરોપીઓમાં હાજીભાઈ આદમભાઈ ખફી, અસગરભાઈ યુસુબભાઈ ખફી અને ગુલામહુશેન ઉર્ફે ભંભો ગફારભાઈ ખફી (ત્રણે રહે. મસીતીયા, જામનગર) તેમજ ચોરીનો મુદ્દામાલ ખરીદનાર બળવંતભાઈ દિલીપભાઈ ગોહીલ (રહે. મોરકંડા, જામનગર)નો સમાવેશ થાય છે. જ્યારે ખીમલીયા ગામનો કાનાભાઈ નામનો આરોપી હજુ પોલીસ પકડથી દૂર છે.પોલીસે આરોપીઓ પાસેથી અંદાજે 120 મીટર કોપર કેબલના ટુકડા (રૂ. 71,400), એક મોટરસાયકલ (રૂ. 25,000), બે મોબાઇલ ફોન (રૂ. 10,000) તેમજ કટર મશીન અને વાયર કાપવાના સાધનો સહિત કુલ રૂ. 1,06,510નો મુદ્દામાલ કબજે કર્યો છે.
તપાસ દરમિયાન કાલાવડ રૂરલ અને લાલપુર પોલીસ સ્ટેશનમાં નોંધાયેલા બે કેબલ ચોરીના ગુનાઓ ઉકેલાયા છે. ઉપરાંત આરોપીઓએ લગભગ એક મહિના અગાઉ રાજકોટ જિલ્લાના ઉપલેટા તાલુકાના વડાળી ગામની સીમમાં આવેલી ચાર પવનચક્કીઓમાંથી પણ કોપર વાયર ચોરીની કબૂલાત આપી હોવાનું પોલીસે જણાવ્યું છે.
મુખ્ય આરોપી હાજીભાઈ ખફી સામે અગાઉ પણ કાલાવડ રૂરલ, લાલપુર અને ભાયાવદર પોલીસ સ્ટેશનોમાં ચોરી અને અન્ય ગુનાઓ નોંધાયેલા હોવાનું પોલીસ તપાસમાં બહાર આવ્યું છે. આ સમગ્ર કાર્યવાહી પીએસઆઈ એમ.વી. ભાટીયા તથા એલસીબી સ્ટાફની ટીમે પોલીસ ઇન્સ્પેક્ટર વી.બી. ચૌધરી ના માર્ગદર્શન હેઠળ પાર પાડી હતી.