મોટર સાયકલ અથડાવા જેવી સામાન્ય બાબતમાં હથિયારો ઉડયા
જામનગર શહેરના ગોકુલનગર જકાતનાકા પાસે આવેલી આશાપુરા હોટલ નજીક મોડી રાત્રે બે જૂથો વચ્ચે થયેલી મારામારી અને ધિંગાણાના બનાવનો વીડિયો સોશિયલ મીડિયામાં વાયરલ થતાં પોલીસ તંત્ર હરકતમાં આવ્યું હતું. તપાસ દરમિયાન બંને જૂથો વચ્ચે અથડામણ થઈ હોવાનું સામે આવતા પોલીસે બંને પક્ષની સામસામે ફરિયાદો નોંધી કુલ 10 શખ્સોને ઝડપી પાડ્યા છે.
પોલીસ તપાસ મુજબ તા. 17 જૂનના રોજ રાત્રે આશરે 11:30 વાગ્યે ગોકુલનગર જકાતનાકા પાસે મોટરસાયકલ અડી જવાની નજીવી બાબતે બોલાચાલી થઈ હતી. બાદમાં બંને પક્ષના લોકો એકત્ર થઈ જતાં મામલો ઉગ્ર બન્યો હતો, અને જાહેરમાં મારામારી સર્જાઈ હતી.
એક ફરિયાદમાં પરેશ અરવિંદભાઈ ધોકીયા એ આરોપીઓ નરેશ ડાંગર, રાહુલ ડાંગર, સાગર બેડીયાવદરા, અમિત આંબલીયા, રોહિત સોલંકી અને ચિની કોળી સામે ગેરકાયદેસર મંડળી રચી લાકડાના ધોકાથી હુમલો કરવો, ઈજાઓ પહોંચાડવી, જાનથી મારી નાખવાની ધમકી આપવી તેમજ રૂ 900 ની રોકડ રકમ અને વાહનની ચાવી બળજબરીથી લઈ જવાના આક્ષેપો સાથે ગુનો નોંધાવ્યો છે.
જ્યારે સામા પક્ષે નરેશ રાજશીભાઈ ડાંગરે પણ પરેશ ધોકીયા, હસનભાઈ સાતીર, પૃથ્વીરાજસિંહ ક્યોર, મનસુખભાઈ શીંગળ અને હરપાલસિંહ જાડેજા સામે મારામારી, ગાળો આપી હુમલો કરવા અને ઈજાઓ પહોંચાડવાની ફરિયાદ નોંધાવી છે.
બનાવના વીડિયો સોશિયલ મીડિયામાં વાયરલ થતાં પોલીસ દ્વારા તાત્કાલિક તપાસ હાથ ધરવામાં આવી હતી. નાયબ પોલીસ અધિક્ષક જયવીરસિંહ ઝાલાના માર્ગદર્શન હેઠળ પોલીસ ઇન્સ્પેક્ટર એન.બી. ડાભી અને સર્વેલન્સ બનાવમાં સંડોવાયેલા તમામ 10 શખ્સોની ઓળખ કરી ઝડપી પાડ્યા હતા. પોલીસે બંને પક્ષો સામે ગુનો નોંધી વધુ તપાસ હાથ ધરી છે.
