ચોપાટીની વણવરસી સાંજ

જય હિન્દ 1 View

રવિવારની સાંજ, પોરબંદરની ચોપાટી અને આકાશમાં ઘેરાયેલું વાદળોનું સામ્રાજ્ય.દુર દરિયાની ક્ષિતિજ સુધી કાળા-ભૂખરા વાદળો જામી પડ્યા છે,જાણે ચિત્રકારે આકાશમાં રાખોડી રંગો છાંટ્યા હોય. વચ્ચે-વચ્ચેથી ડોકાતું સંધ્યાનું અજવાળું વાદળોને વધુ ઘેરા અને રહસ્યમય બનાવી રહ્યું છે.મેઘરાજા પોરબંદરની ધરા ઉપર વરસવા માટે આળસ કરી રહ્યા છે. આકાશ આખું વાદળોથી લદાયેલું છે, પણ વરસાદની એક બુંદ પણ ધરતી પર પડતી નથી. ખેડૂતો આકાશ સામે મીટ માંડીને બેઠા છે, તો શહેરીજનો આ વણવરસી વાદળોને જોવા ચોપાટી પર આવી ગયા છે. દરિયો શાંત છે, પણ આકાશ અશાંત છે. દરિયામાં દૂર-દૂર બોટોના ટમટમતા દીવા અને કિનારે ટહેલતા માણસોના પડછાયા આ સાંજને વધુ જીવંત બનાવે છે. પવનમાં ભેજ છે, ઠંડક છે, પણ વરસાદ નથી. આ છે પોરબંદરની અધૂરી ચોમાસાની સાંજ – આંખોને ગમે તેવી, હૃદયને સ્પર્શે તેવી, પણ ધરતીને તરસી રાખે તેવી આ તસ્વીર ક્લિક કરનાર જિજ્ઞેશ પોપટને અનુભવાઇ રહી છે. (તસ્વીર: જિજ્ઞેશ પોપટ)

રિલેટેડ ન્યૂઝ