દોઢ વર્ષથી માજોઠીનગરનો શખ્સ કરતો હતો રિફીલીંગ; 8 લાખથી વધુનો મુદામાલ જપ્ત
રાજકોટ તા.24
થોરાળામાં દૂધસાગર રોડ ઉપર ગત મોડી રાત્રે લાંબા સમય પછી પુરવઠા તંત્રએ દરોડો પાડી ગેસ રિફલીંગનું જબ્બર કૌભાંડનો પર્દાફાશ કરી આઈઓસી અને ગોબેકના ગેસના નાના-મોટા 502 બાટલા સાતે એક સખ્સને રંગેહાથ ઝડપી પાડવામાં આવ્યો છે. ગેસ રિફલીંગ અંગે પૂરવઠા તંત્ર દ્વારા પોલીસ ફરિયાદની તજવીજ હાથ ધરવામા આવી છે. પૂરવઠા અધિકારીએ કલેક્ટરને રિપોર્ટ કર્યો છે. ઈન્ચાર્જ પૂરવઠા અધિકારી સુરજ સુથારે જણાવ્યું હતું કે, ગઈકાલે થોરાળાના દૂધસાગર રોડ ઉપર એક ગોડાઉનમાં ગેસના બાટલામાંથી ગેસ કાઢવામા આવે છે. તેવી બાતમીના આધારે દરોડો પાડતા આઈઓસી અને ગો બેક એજન્સીના બાટલામાં ગેસ રિફલીંગનું કૌભાંડ રંગેહાથ ઝડપીલેવામા આવ્યું હતું. પૂરવઠા અધિકારી સહિતની ટીમે આ મામલે ઝીણવટભરી તપાસ હાથ ધરતા માજોઠીનગરના સલીમ અલી મોહમ્મદ પીપર નામના શખ્સ લાંબા સમયથી ગેસ કાઢી તેનું વેચાણ કરવામા આવતું હતું. બજારમાં 420 રૂપિયામાં પાંચ કિલો ગેસના બાટલા મળે છે. તેની સામે આ શખ્સ દ્વારા રૂા. 450માં થોરાળા વિસ્તારમાં રહેતા મજુરોને બાટલા પધરાવવામા આવતા હતા. એટલું જ નહીં આ કૌભાંડમાં શહેરની બે ગેસ એજન્સીની સંડોવણીની શંકા વ્યક્ત કરવામા આવી છે. રૂૂદ્ર ગઢવી તેમજ પુરવઠા નિરીક્ષક કિરીટસિંહ એમ. ઝાલા તથા શ્રી અમિતભાઈ પરમારની ટીમ દ્વારા રહેણાંક વિસ્તારમાં ચાલતાં ગેરકાયદે ગેસ રીફીલીંગ કૃત્ય સામે દરોડો પાડી આકસ્મિક તપાસ હાથ ધરવામાં આવી હતી. રાજકોટ શહેરમાં આવેલ દૂધસાગર રોડ ઉપર શેરબાનુ મસ્જિદની બાજુમાં આવેલ માજોઠીનગરના ખૂણે હાઇવે નજીક એક મોટા વંડામાં ગેરકાયદેસર રીતે મોટાપાયે ગેસ રીફીલિંગની કામગીરી થતી હતી. અધિકારીઓની તપાસ દરમિયાન સ્થળ પર હાજર સલીમ અલી મોહમ્મદ નામના શખ્સ આ કામગીરી કરતો હોવાનું જણાયું હતું. મોટા સીલીન્ડરમાંથી ઇલેક્ટ્રિક મોટરની મદદથી નાના નાના ગેસ સીલીન્ડર ગેરકાયદે ભરવામાં આવતા હતા. આ વંડાની નજીક જ મસ્જિદ આવેલી હોવાથી, લોકોની સતત અવરજવર રહેતી હોય છે. રહેણાંક વિસ્તારમાં અમુલ્ય માનવ જીવનને જોખમમાં મૂકીને કોઈપણ પ્રકારના અગ્નિશામક યંત્રો રાખ્યા વગર જ અતિ જોખમી અને જવલનશીલ એવા એલ.પી.જી. ગેસ રીફીલિંગનું ગેરકાયદેસર રીતે બેદરકારીભર્યું કૃત્ય આચરી ગેસની ચોરી કરવા બદલ પ્રવાહી પેટ્રોલિયમ ગેસ પુરવઠા અને વિતરણ નિયમન હુકમ 2009 તથા ગેસ સીલીન્ડર રૂૂલ્સ 2004 તથા 2016ની જોગવાઈ ઓના ભંગ બદલ કાર્યવાહી કરી ગુનો નોધવામાં આવ્યો હતો. આ તપાસ દરમિયાન રાંધણગેસના 21 કી.ગ્રા.ના ભરેલા 24 બાટલા, 5 કી.ગ્રા.નાં 68 બાટલા, 6 વજનકાંટા, 06 ઇલેક્ટ્રિક મોટર, 01 માલવાહક રીક્ષા, 21 કી.ગ્રા.ના 85 ખાલી બાટલા, 19 કી.ગ્રા.નાં ખાલી 26 બાટલા, 5 કી.ગ્રા. નાં 199 ખાલી બાટલા, 101 ગેસના ખાલી બાટલાનો ભંગાર સહીત કુલ રૂૂ. 8,31,532/- નો મુદ્દામાલ જપ્ત કરી ખાલી બાટલા પૂરવઠા ના અને ભરેલ બાટલા આઈઓસીના ગોડાઉનમાં મોકલી દેવામાં આવ્યા છે.
