વિશ્વની 100 પ્રભાવશાળી કંપનીમાં “જિયોનો સમાવેશ

(પ્રતિનિધિ દ્વારા) મુંબઈ,તા.29
રિલાયન્સ જૂથીની જિયો પ્લેટફોર્મ્સ વિશ્વની 100 સૌથી પ્રભાવશાળી કંપનીઓમાં સામેલ થઈ ગઈ છે. ટાઇમ મેગેઝીન દ્વારા વિશ્વની 100 સૌથી પ્રભાવશાળી કંપનીઓની જારી કરવામાં આવેલી યાદીમાં રિલાયન્સ જૂથના ડિજિટલ સાહસ જિયો પ્લેટફોર્મ્સને સામેલ કરવામાં આવી છે. ટોપ-100માં અન્ય એક ભારતીય કંપની બાઈજુસને પણ સ્થાન મળ્યું છે.
ટાઇમ મેગેઝીનની યાદીમાં જણાવવામાં આવ્યું છે કે, પ્રથમ વખત જાહેર કરાયેલી ટાઇમ-100 મોસ્ટ ઇન્ફ્લુએન્શિયલ કંપનીઓની યાદીના કેન્દ્રમાં એવી કંપનીઓનો સમાવેશ કરવામાં આવ્યો છે જે ભવિષ્યની રૂપરેખા તૈયાર કરે છે.
આ યાદી તૈયાર કરવા માટે ટાઇમ દ્વારા સ્વાસ્થ્ય સંભાળ, મનોરંજન, વાહનવ્યવહાર, ટેક્નોલોજી સહિતના ક્ષેત્રોની કંપનીઓનું આવેદન આવકાર્યું હતું અને તેમની સુસંગતતા, તેમની અસરો, નાવિન્ય, નેતૃત્વ, મહત્વાકાંક્ષાઓ અને સફળતાઓ સહિતના પરિમાણો પર ચકાસણી કરવામાં આવી હતી.
મેગેઝિને જણાવ્યું છે કે, આમાં 100 કંપનીઓનું વૈવિધ્ય જોઈ શકાય છે. રિસાયકલ કરવાની ટેક્નોલોજી વિકસાવનારા સ્ટાર્ટઅપથી લઈને નાણાનું ભવિષ્ય તૈયાર કરનારી ક્રિપ્ટોકરન્સીથી આવતીકાલ માટે વેક્સિન શોધનારી ફાર્મા કંપનીઓને આ યાદીમાં સામેલ કરવામાં આવી છે. આવી કંપનીઓ સાથે મળીને તેમનું નેતૃત્વ કરનારા ભવિષ્યની કેડી કંડારવામાં મોટી મદદ કરી રહ્યા છે.
યાદીમાં કોણ-કોણ?
આ યાદીમાં જિયો ઉપરાંત ઝૂમ, એડિદાસ, ટિકટોક, મોડર્ના અને નેટફ્લિક્સ જેવી વિવિધ ક્ષેત્રની કંપનીઓ સામેલ છે. જિયો પ્લેટફોર્મ્સ અંગે મેગેઝિને જણાવ્યું હતું કે, છેલ્લા કેટલાક વર્ષોમાં ઔદ્યોગિક જૂથ રિલાયન્સ ઈન્ડસ્ટ્રીઝે ભારતનું સૌથી મોટું 4ૠ નેટવર્ક સ્થાપ્યું છે જે વિશ્વમાં સૌથી ઓછા (5 સેન્ટથી પણ ઓછા દરે એક જીબી ડેટા) દરે ડેટા પૂરો પાડે છે. તેની પાસે 410 મિલિયન ગ્રાહકો છે અને તેના કારણે ઘણા રોકાણકારો જિયો પ્લેટફોર્મ્સમાં રોકાણ કરવા આકર્ષાયા છે.
આ રોકાણકારોમાં વોટ્સએપ આધારિત ઈકોમર્સ પ્લેટફોર્મ વિકસાવનારા ફેસબુક અને ગૂગલ પણ સામેલ છે. ગત વર્ષે જિયોએ 20 બિલિયન યુએસ ડોલરની મૂડી ઊભી કરી હતી. નોંધનીય છે કે બાઈજુસનો સમાવેશ ટેસ્લા, હુવેઈ, શોપિફાય અને ડીડી ચુક્સિંગ જેવી કંપનીઓ સાથે કરવામાં આવ્યો છે.

રિલેટેડ ન્યૂઝ