પક્ષના હિતમાં ભાજપે ઉત્તરાખંડના CM રાવતનું રાજીનામું લઈ લીધું.

રાવતના બદલે કોણ આવશે?
હાલ ચાલતી ચર્ચા મુજબ પર્યટન મંત્રી સત્યપાલ મહારાજ, કેન્દ્રિય શિક્ષણ મંત્રી રમેશ પોખરિયાલ નિશાંક, પૂર્વ પ્રદેશ પ્રમુખ અને લોકસભાના સાંસદ અજય ભટ્ટ, પૂર્વ સીએમ અને મહારાષ્ટ્રના હાલના ગવર્નર ભગતસિંહ કોશયારી, મંત્રી ધનસિંહ રાવત, રાજ્યસભાના સાંસદ અનિલ બલુની, સંઘના જનરલ સેક્રેટરી સુરેશ ભટ્ટના નામ હાલ નવા સીએમની રેસમાં ચર્ચાઈ રહ્યા છે.

(પ્રતિનિધિ દ્વારા) દેહરાદૂન તા.9
ઉત્તરાખંડમાં થયેલા મોટા રાજકીય ઉલટફેરમાં રાજ્યના મુખ્યમંત્રી ત્રિવેન્દ્રસિંહ રાવતે રાજીનામું ધરી દીધું છે. બુધવારે નવા સીએમનું નામ જાહેર કરવામાં આવશે તેવું સૂત્રોના હવાલેથી જાણવા મળી રહ્યું છે. ભારતીય જનતા પાર્ટીએ આ પહેલા દિલ્હીથી બે નિરીક્ષકોને રાજ્યમાં મોકલ્યા હતા. ત્યારબાદ ખુદ સીએમ રાવતે દિલ્હી આવીને પક્ષના સિનિયર નેતાઓ સાથે મુલાકાત કરી હતી. લાંબા ઘટનાક્રમ બાદ મંગળવારે રાવતે રાજીનામું આપી દીધું છે.
ઉત્તરાખંડમાં આવતા વર્ષે વિધાનસભાની ચૂંટણી યોજાવાની છે. 2017માં થયેલી વિધાનસભા ચૂંટણીમાં ભાજપે કોંગ્રેસને હરાવીને રાજ્યમાં સત્તા પ્રાપ્ત કરી હતી અને માર્ચ 2017માં ત્રિવેન્દ્રસિંહને સીએમ બનાવવામાં આવ્યા હતા. તેમની કાર્યપદ્ધતિ સામે પક્ષમાંથી જ વિરોધનો સૂર ઉભો થયો હતો, અને તેમને હટાવવાની ઉપર સુધી રજૂઆતો કરવામાં આવી હતી.
ઉત્તરાખડના ભાજપના તમામ ધારાસભ્યો આવતીકાલે સવારે 10 વાગ્યે પાર્ટીના હેડક્વાર્ટર પર મળશે, અને નવા સીએમના નામ પર ચર્ચા કરવામાં આવશે. બીજી તરફ, રાજીનામું આપ્યા બાદ રાવતે પત્રકારો સાથે વાત કરતાં જણાવ્યું હતું કે તેમની સરકારે શિક્ષણ ક્ષેત્રે ખૂબ જ કામ કર્યું અને અનેક યોજનાઓ પણ શરુ કરી.
રાવતે જણાવ્યું હતું કે, પક્ષની અંદર એવી વાત ચર્ચાઈ રહી હતી કે રાજ્યમાં પક્ષની કમાન કોઈ બીજા વ્યક્તિને સોંપવામાં આવે. પક્ષ પોતાને આટલી મોટી જવાબદારી સોંપશે તેની પોતે ક્યારેય કલ્પના નહોતી કરી તેમ પણ તેમણે કહ્યું હતું. દેવભૂમિની સેવા કરવાનો ભાજપે પોતાને અવસર આપ્યો હોવાનું જણાવતા રાવતે કહ્યું હતું કે, આ તક તેમના જીવનમાં મળેલી સોનેરી તક સમાન હતી.
ઉત્તરાખંડમાં ભાજપના કેટલાક ધારાસભ્યો સીએમ રાવતની કામકાજ કરવાની શૈલીથી નારાજ હોવાના કારણે તેમની સામે વિરોધનો સૂર ઉભો થયો હતો. તેમની સામે ઉચ્ચ સ્તરે ફરિયાદો પણ થઈ હતી, જેને પગલે પક્ષે બે નિરીક્ષકોને રાજ્યમાં મોકલ્યા હતા, અને ત્યારબાદ રાવત પોતે પણ દિલ્હી આવ્યા હતા.
દેવભૂમિ તરીકે જાણીતા આ રાજ્યમાં ભાજપે સત્તાના ચાર વર્ષ બાદ સીએમને હટાવતા પૂર્વ સીએમ અને કોંગ્રેસના નેતા હરિશ રાવતે જણાવ્યું હતું કે, ભાજપની કેન્દ્રિય નેતાગીરીએ એ વાતનો સ્વીકાર કર્યો છે કે રાજ્યની હાલની સરકારે કોઈ કામ નથી કર્યું. ભાજપ ભલે રાવતને સ્થાને બીજા કોઈને સત્તા પર લાવે, પરંતુ એ વાત સ્પષ્ટ છે કે 2022ની ચૂંટણીમાં ભાજપ ફરી સત્તા પ્રાપ્ત નહીં કરી શકે.

રિલેટેડ ન્યૂઝ