જો તમે ઉનાળાની ગરમીમાં શરીરને ઠંડક આપવાની સાથે હેલ્થ પણ જાળવી રાખવા માંગતા હોવ, તો દક્ષિણ ભારતનું પ્રખ્યાત હેલ્ધી ડ્રિંક ‘રાગી આંબલી’ બેસ્ટ ઓપ્શન છે. રાગી અને દહીંના મેળાપથી બનતું આ પીણું એક ઉત્તમ કુદરતી પ્રોબાયોટિક છે, જે પાચનક્રિયા સુધારે છે અને એનર્જી આપે છે.
ચાલો જાણીએ આ પૌષ્ટિક પીણું ઘરે બનાવવાની એકદમ સરળ રીત:
જરૂરી સામગ્રી (Ingredients):
- રાગીનો લોટ: 1 કપ
- પાણી: 1 કપ (ખીરું બનાવવા) + 3 કપ (ગરમ કરવા) + 5 કપ (આથો લાવવા માટે)
- મોળું કે ખાટું દહીં: 1 કપ
- લીલાં મરચાં: 2 નંગ
- આદુ: 1 ઇંચનો ટુકડો
- મીઠો લીમડો (કઢી પત્તા): 10 થી 15 નંગ
- લીલા ધાણા: બારીક સમારેલા
- મીઠું: સ્વાદ અનુસાર
બનાવવાની સ્ટેપ-બાય-સ્ટેપ રીત
સ્ટેપ 1: રાગીનું ખીરું તૈયાર કરો
સૌપ્રથમ એક વાસણમાં 1 કપ રાગીનો લોટ લો. તેમાં 1 કપ પાણી ઉમેરીને તેને બરાબર મિક્સ કરી લો, જેથી તેમાં કોઈ ગાંઠો (Lumps) ન રહે અને એકદમ સુંવાળું ખીરું તૈયાર થાય.
સ્ટેપ 2: રાગીને રાંધવી (બફાવા દેવી)
હવે એક કડાઈ કે તપેલીમાં 3 કપ પાણી ગરમ કરવા મૂકો. પાણી બરાબર ઉકળવા લાગે એટલે ગેસની આંચ ધીમી કરી, તેમાં તૈયાર કરેલું રાગીનું ખીરું ધીમે-ધીમે ઉમેરતા જાવ અને સતત હલાવતા રહો. મિશ્રણ ઘટ્ટ થાય ત્યાં સુધી તેને મધ્યમ આંચ પર પકાવો. મિશ્રણ સરસ ઘટ્ટ થઈ જાય એટલે ગેસ બંધ કરી, ઢાંકણ ઢાંકીને 3-4 મિનિટ વરાળમાં પાકવા દો અને પછી તેને સંપૂર્ણપણે ઠંડુ થવા દો.
સ્ટેપ 3: આથો (Fermentation) લાવવાની પ્રક્રિયા
રાગી આંબલીનો અસલી સ્વાદ આથો લાવવાથી જ આવે છે. આ માટે એક માટીનું વાસણ (અથવા સામાન્ય વાસણ) લો અને તેમાં 5 કપ પાણી રેડો. હવે ઠંડા થયેલા રાગીના મિશ્રણના નાના-નાના લુઆ (ગોળા) બનાવીને આ પાણીમાં નાખો. વાસણને ઢાંકીને 8 થી 10 કલાક માટે આથો આવવા માટે બાજુ પર મૂકી દો. આથો આવી જતાં તેમાંથી હળવી ખાટી સુગંધ આવવા લાગશે.
સ્ટેપ 4: મિશ્રણ તૈયાર કરવું
આથો આવ્યા પછી, પાણીમાં રહેલા રાગીના ટુકડાને હાથથી અથવા બ્લેન્ડરથી બરાબર મેશ કરી લો જેથી તે પાણી સાથે એકરસ થઈ જાય. હવે તેમાં 1 કપ દહીં ઉમેરીને આખું મિશ્રણ એકદમ સ્મૂધ બને ત્યાં સુધી વલોવી લો.
સ્ટેપ 5: ફાઇનલ ટચ અને સર્વિંગ
એક ચોપરમાં લીલાં મરચાં, આદુ, મીઠો લીમડો અને કોથમીરને એકદમ ઝીણા સમારી લો (અથવા અધકચરા વાટી લો). આ મસાલો અને સ્વાદ મુજબ મીઠું રાગીના મિશ્રણમાં ઉમેરીને બરાબર હલાવી લો.
તમારી કેલ્શિયમ અને પ્રોટીનથી ભરપૂર, સુપર ટેસ્ટી ‘રાગી આંબલી’ તૈયાર છે! આ હેલ્ધી ડ્રિંકને ઠંડુ કરીને સર્વ કરો.
