જો તમને સવાર-સાંજ નાસ્તામાં કંઈક નવું અને ચટપટું ખાવાનું મન થતું હોય, તો કાઠિયાવાડી સ્ટાઈલનું જુવારનું ખીચું શ્રેષ્ઠ વિકલ્પ છે. સ્વાદમાં એકદમ લાજવાબ અને પચવામાં હળવું આ ખીચું ખૂબ જ ઓછા તેલમાં અને માત્ર ૧૦ થી ૧૫ મિનિટમાં બની જાય છે. હેલ્ધી નાસ્તો શોધતા લોકો માટે આ પરફેક્ટ ડિશ છે. ચાલો જાણીએ આ કાઠિયાવાડી ખીચું બનાવવાની રીત.
જરૂરી સામગ્રી:
- જુવારનો લોટ: અડધો કપ
- ખાટું દહીં: અડધો કપ (અથવા પાતળી છાશ)
- પાણી: દોઢ કપ
- જીરું: અડધી ચમચી
- સફેદ તલ: અડધી ચમચી
- હિંગ: પા ચમચી
- આદુ-મરચાંની પેસ્ટ: ૧ ચમચી
- કઢી પત્તા અને લીલા ધાણા: જરૂર મુજબ
- ઘી: ૧ ચમચી
- મગફળીનું તેલ: પીરસવા માટે
- અથાણાનો મસાલો (મેથીયો મસાલો): સ્વાદાનુસાર
- મીઠું અને હળદર: સ્વાદ મુજબ
બનાવવાની રીત:
- બેટર તૈયાર કરવું: સૌથી પહેલા એક વાસણમાં જુવારનો લોટ લો. તેમાં ખાટું દહીં અને પાણી ઉમેરીને ગંઠાઇ (લમ્પ્સ) ન રહે તે રીતે બરાબર હલાવીને પાતળું મિશ્રણ તૈયાર કરી લો. દહીં-પાણીને બદલે તમે સીધી ખાટી છાશનો પણ ઉપયોગ કરી શકો છો. હવે આ મિશ્રણમાં સ્વાદ મુજબ મીઠું અને થોડી હળદર ઉમેરીને મિક્સ કરી લો.
- વઘાર કરવો: એક કડાઈ કે પેનમાં ૧ ચમચી ઘી ગરમ કરો. ઘી ગરમ થાય એટલે તેમાં હિંગ, જીરું, સફેદ તલ, કઢી પત્તા અને આદુ-મરચાંની પેસ્ટ ઉમેરીને સાંતળી લો. વઘાર સરસ થઈ જાય એટલે તેમાં તૈયાર કરેલું જુવારના લોટ અને છાશનું મિશ્રણ ઉમેરી દો.
- ખીચું પકવવું: મિશ્રણ ઉમેર્યા બાદ તાવડી કે ચમચા વડે તેને સતત હલાવતા રહો જેથી નીચે ચોંટી ના જાય અને ગંઠાઇ ના પડે. મધ્યમ આંચ પર બેટર થોડું ઘટ્ટ થાય ત્યાં સુધી રંધાવા દો.
- ધીમી આંચે ચડવા દેવું: બેટર ઘટ્ટ થઈ જાય એટલે ગેસની આંચ ધીમી કરી, વાસણ પર ઢાંકણ ઢાંકીને ૩ થી ૫ મિનિટ માટે વરાળમાં ચડવા દો. વચ્ચે એકાદ વાર હલાવી લેવું. ખીચું બરાબર ચડી જાય એટલે ગેસ બંધ કરી ઉપર બારીક સમારેલી કોથમીર ભભરાવો.
સરવિંગ ટીપ:
ગરમાગરમ જુવારના ખીચુને પ્લેટમાં કાઢી ઉપરથી કાચું મગફળીનું તેલ (અથવા દેશી ઘી) અને ચટપટો અથાણાનો મસાલો ભભરાવીને સર્વ કરો. ચા સાથે આ ગરમાગરમ કાઠિયાવાડી ખીચું ખાવાની અલગ જ મજા આવે છે.
