દ્વારકાધીશ મંદિરમાં નૃસિંહ જયંતિની ઉજવણી કરાઈ
દેવભૂમિ દ્વારકાના સુપ્રસિદ્ધ જગતમંદિરમાં વૈશાખ સુદ ચતુર્દશીના પાવન દિવસે ગુરુવારે નૃસિંહ જયંતિનો પાવન ઉત્સવ ધાર્મિક ઉત્સાહ અને ભક્તિભાવ સાથે ઉજવાયો હતો. આ અવસર પર ભગવાન દ્વારકાધીશે નૃસિંહ અવતારનું વિશેષ શૃંગાર ધારણ કરતા મંદિરમાં દિવ્ય અને આકર્ષક માહોલ સર્જાયો હતો. દિવસ દરમિયાન નિયમિત દર્શન વ્યવસ્થા બાદ સાંજે 5 વાગ્યે શ્રીજીના ઉત્થાપન દર્શન યોજાયા હતા, જેમાં ભક્તોએ મોટી સંખ્યામાં હાજરી આપી હતી. ત્યાર બાદ સાંજે 7 વાગ્યાથી 7:30 વાગ્યા સુધી મંદિર પરિસરમાં બંધ પડદે અભિષેક પૂજા વિધિવત રીતે સંપન્ન કરવામાં આવી હતી. આ પૂજામાં વૈદિક મંત્રોચ્ચાર સાથે ભગવાનની આરાધના કરવામાં આવી હતી.
સાંજે 7:30 વાગ્યે નૃસિંહ જયંતિ ઉત્સવની મુખ્ય ઉજવણી સાથે સંધ્યા આરતી કરવામાં આવી હતી, જેમાં સ્થાનીક તેમજ બહારગામથી આવેલા હજારો ભક્તોએ ઉપસ્થિત રહી ભગવાનના આશીર્વાદ પ્રાપ્ત કર્યા હતા. સમગ્ર કાર્યક્રમ દરમિયાન ભક્તિમય વાતાવરણ સર્જાયું હતું અને મંદિર પરિસર જયઘોષથી ગુંજી ઉઠ્યું હતું.
