ઉત્તર ભારતમાં ગાઢ ધુમ્મસના કારણે જનજીવન ખોરવાયુ
ઉત્તર પ્રદેશ અને દિલ્હી સહિત સમગ્ર ઉત્તર ભારતમાં હાલમાં તીવ્ર ઠંડી પડી રહી છે. ધુમ્મસના કારણે સામાન્ય જનજીવન ખોરવાઈ ગયું છે. ભારતીય હવામાન વિભાગ એ ઉત્તર ભારત અને નજીકના મધ્ય ભારત માટે હવામાનની ગંભીર ચેતવણી જારી કરી છે. આગામી સાત દિવસ સુધી રાત્રિ અને સવારના કલાકો દરમિયાન ગાઢ ધુમ્મસ ચાલુ રહેવાની શક્યતા છે, અને ઘણા રાજ્યોમાં ઠંડીનું મોજું સતત તબાહી મચાવશે.
5 થી 8 જાન્યુઆરી દરમિયાન પંજાબ, હરિયાણા અને ચંદીગઢમાં, 5 થી 9 જાન્યુઆરી દરમિયાન પશ્ચિમ રાજસ્થાનમાં, 5 થી 10 જાન્યુઆરી દરમિયાન પૂર્વ રાજસ્થાનમાં અને 6 થી 7 જાન્યુઆરી દરમિયાન ઝારખંડમાં ઠંડીનું મોજું ફરી શકે છે.
ઉત્તર અને મધ્ય કાશ્મીરના ઊંચાઈવાળા વિસ્તારોમાં છૂટાછવાયા સ્થળોએ હળવો વરસાદ અથવા હિમવર્ષા થવાની આગાહી કરી છે. હવામાન વિભાગે જણાવ્યું છે કે 6 જાન્યુઆરીએ ઉત્તરાખંડના કેટલાક વિસ્તારોમાં વરસાદ અથવા હિમવર્ષા થઈ શકે છે. દરમિયાન, આગામી ત્રણ દિવસમાં મધ્ય અને પૂર્વ ભારતમાં લઘુત્તમ તાપમાનમાં ધીમે ધીમે બે થી ચાર ડિગ્રી સેલ્સિયસનો ઘટાડો થવાની ધારણા છે, ત્યારબાદ આગામી ચાર દિવસ સુધી તાપમાનમાં કોઈ ખાસ ફેરફાર થશે નહીં.
