પ્રથમ વખત ખાનગી પ્લેટફોર્મ મારફતે સરકારી કાર્યક્રમ માટે ડિજિટલ પ્રી-બુકિંગ થયું, ક્યુઆર કોડ આધારિત પ્રવેશ માટે અદ્યતન ટેક્નોલોજીનો ઉપયોગ કરાયો
વડોદરા: વડોદરામાં યોજાનારા ‘NaMo4Viksit Bharat કાર્યક્રમને જબરદસ્ત પ્રતિસાદ મળ્યો છે. બુકમાયશો મારફતે રજિસ્ટ્રેશન શરૂ થયાના એક કલાકની અંદર 6,000થી વધુ પાસ બુક થઈ ગયા હતા. ઉપલબ્ધ તમામ પાસ બુક થઈ ગયા બાદ રજિસ્ટ્રેશન પ્રક્રિયા બંધ કરી દેવામાં આવી હતી, જ્યારે આશરે 15,000 અન્ય અરજદારોને વેઇટિંગ લિસ્ટમાં મૂકવામાં આવ્યા છે.
વડોદરાની મહારાજા સયાજીરાવ યુનિવર્સિટી પેવેલિયન ખાતે 8 સપ્ટેમ્બરે વડાપ્રધાન નરેન્દ્ર મોદી આ કાર્યક્રમને સંબોધશે. કાર્યક્રમમાં અદ્યતન ટેક્નોલોજી આધારિત ડિજિટલ રજિસ્ટ્રેશન અને પ્રવેશ વ્યવસ્થાનો ઉપયોગ કરવામાં આવશે. આ પહેલની વિશેષતા એ પણ છે કે પ્રથમ વખત કોઈ સરકારી કાર્યક્રમ માટે ખાનગી ડિજિટલ પ્લેટફોર્મ મારફતે મફત પ્રી-બુકિંગની સુવિધા આપવામાં આવી છે. વડોદરા મ્યુનિસિપલ કોર્પોરેશન (વીએમસી) દ્વારા રજિસ્ટ્રેશન પ્રક્રિયા માટે બુકમાયશો પ્લેટફોર્મનો ઉપયોગ કરવામાં આવ્યો છે.
કાર્યક્રમ માટેની સમગ્ર રજિસ્ટ્રેશન પ્રક્રિયા તેમજ સ્થળ પર પ્રવેશની વ્યવસ્થા ડિજિટલ રીતે કરવામાં આવી રહી છે. પાત્ર ઠરનારા સહભાગીઓને ઈમેલ અને મોબાઇલ મારફતે ખાસ રજિસ્ટ્રેશન લિંક આપવામાં આવી હતી. ત્યારબાદ તેમણે પોતાનું નામ, મોબાઇલ નંબર, ફોટોગ્રાફ અને સરકાર દ્વારા જારી કરવામાં આવેલ ઓળખપત્રની વિગતો આપીને ઓનલાઈન રજિસ્ટ્રેશન પ્રક્રિયા પૂર્ણ કરી હતી.
