યાત્રિકોની સુરક્ષા ધ્યાનમાં રાખી સવારે સેવા સ્થગિત; પવનની ગતિ ઓછી થયા બાદ ફરી શરૂ કરવાની શક્યતા
જૂનાગઢમાં આવેલા ગિરનાર પર્વત પર ચાલતી રોપવે સેવા આજે વહેલી સવારથી ભારે પવનના કારણે બંધ રાખવામાં આવી છે. પર્વત વિસ્તારમાં અચાનક પવનની ગતિ વધી જતાં રોપવેનું સંચાલન કરવું મુશ્કેલ બન્યું હતું, જેના કારણે સુરક્ષાના કારણોસર સેવા અસ્થાયી રીતે બંધ કરવાનો નિર્ણય લેવામાં આવ્યો હતો.
મળતી માહિતી મુજબ ગિરનાર પર્વત વિસ્તારમાં સવારે પવનનું દબાણ વધુ રહેતાં રોપવે સેવા તેના નિર્ધારિત સમયે શરૂ થઈ શકી નહોતી. યાત્રિકોની સુરક્ષા સર્વોચ્ચ માનતા તંત્ર દ્વારા રોપવે સેવા બંધ રાખવામાં આવી છે.
ગિરનાર રોપવે દ્વારા દરરોજ મોટી સંખ્યામાં ભક્તો અને પ્રવાસીઓ અંબાજી મંદિર સુધી પહોંચે છે. જોકે આજે પવનની ગતિ વધુ હોવાને કારણે રોપવે ચલાવવું જોખમી બની શકે તેવા સંજોગોમાં તંત્ર દ્વારા આ સાવચેતીનો પગલું લેવામાં આવ્યું છે.
સંચાલક તંત્રના જણાવ્યા મુજબ જો પવનની ગતિ સામાન્ય થશે તો રોપવે સેવા ફરી શરૂ કરવામાં આવશે. હાલ પરિસ્થિતિ પર સતત નજર રાખવામાં આવી રહી છે અને યાત્રિકોને અનાવશ્યક ભીડ ન કરવા તેમજ તંત્રની સૂચનાઓનું પાલન કરવાની અપીલ કરવામાં આવી છે.
