ભારે વરસાદમાં શાળાની દીવાલ ધરાશાયી થતાં આચાર્યે સમય સૂચકતા દાખવી : બાળકોની સુરક્ષા માટે હંગામી વ્યવસ્થા ઉભી કરી

જય હિન્દ 0 View

તાજેતરમાં પડેલા ભારે વરસાદના કારણે ઉના તાલુકાના જંગવડ (કોદિયા સીમ) પ્રાથમિક શાળાની નદી તરફ આવેલી સુરક્ષા દીવાલનો એક ભાગ ધરાશાયી થયો હતો. દીવાલ પડી જતાં શાળા પરિસર ખુલ્લું થઈ ગયું હતું, જેના કારણે જંગલી પ્રાણીઓના પ્રવેશ તેમજ વિદ્યાર્થીઓની સુરક્ષાને લઈને ચિંતા ઉભી થઈ હતી.
આ પરિસ્થિતિમાં શાળાના આચાર્ય અને વિદ્યાસહાયક કનુભાઈ ભાલીયાએ સમયસૂચકતા અને જવાબદારીનું ઉત્તમ ઉદાહરણ પૂરું પાડ્યું હતું. તેમણે સ્થાનિક સ્તરે ઉપલબ્ધ સંસાધનોનો ઉપયોગ કરીને તાત્કાલિક હંગામી સુરક્ષા વ્યવસ્થા ઉભી કરી હતી, જેથી વિદ્યાર્થીઓ અને શાળા પરિસરની સલામતી જળવાઈ રહે.
નોંધનીય છે કે કનુભાઈ ભાલીયા શિક્ષણ સેવામાં જોડાયાને હજુ એક વર્ષ જેટલો જ સમય થયો છે. તેમ છતાં તેમણે શાળાની સુરક્ષા અને વિદ્યાર્થીઓના હિતને પ્રાથમિકતા આપી જે કામગીરી કરી છે, તે તેમની ફરજ પ્રત્યેની નિષ્ઠા અને બાળકો પ્રત્યેની સંવેદનશીલતા દર્શાવે છે.
સ્થાનિક સ્તરે તેમની આ કામગીરીને સરાહના મળી રહી છે. શિક્ષણ જગત સાથે સંકળાયેલા લોકોનું માનવું છે કે શાળા સલામતી માટે સમયસર લેવાયેલું આ પગલું અન્ય શિક્ષકો માટે પણ પ્રેરણારૂપ બની રહેશે.

રિલેટેડ ન્યૂઝ