રંગોળી સ્પર્ધાના વિજેતાઓનું બહુમાન કરાયું; કેન્દ્રીય રાજય મંત્રી નિમુબહેન બાંભણીયા, ધારાસભ્યો સહિતના આગેવાનો ઉપસ્થિત રહ્યા
વડાપ્રધાન નરેન્દ્રભાઈ મોદીના જનસેવા થી રાષ્ટ્ર સેવાના 25 વર્ષના ઉપલક્ષમાં સોમનાથ ખાતે કેન્દ્રિય રાજ્યમંત્રી નિમુબહેન બાંભણિયાની ઉપસ્થિતિમાં વિકસિત ભારત સંકલ્પ સભા અને સેવા જ્યોતિ યાત્રાનું આયોજન કરવામાં આવ્યું હતું.
પ્રભાસપાટણના સદભાવના મેદાન ખાતે કેન્દ્રિય રાજયમંત્રી નિમુબહેન બાંભણિયા, સાંસદ રાજેશભાઈ ચુડાસમા સહિતના મહાનુભાવોના હસ્તે સેવા જ્યોતિ પ્રગટાવી વિવિધ ત્રણ ’સેવા જ્યોતિ રથ’નું પ્રસ્થાન કરાવવામાં આવ્યું હતું. વેરાવળ શહેર તથા વેરાવળ ગ્રામ્ય તાલુકાને આવરી લેતા રથ નં.1 સાથે મંત્રીશ્રી સહિતના મહાનુભાવો સદભાવના મેદાન થી સોમનાથ મંદિર પાર્કિંગ સુધી પગપાળા સામેલ થયા હતાં. આ સાથે જ ઉના-કોડિનાર- સૂત્રાપાડા તાલુકાને આવરી લેતા રથ નં.2 સદભાવના મેદાનથી એ.પી.એમ.સી. કાજલી સુધી, તાલાલા-ગીરગઢડા તાલુકાને આવરી લઈ રથ નં.3 સદભાવના મેદાનથી સરોવર પોર્ટિકો સુધીની ’સેવા જ્યોતિ રથ’ યાત્રા યોજાઈ હતી. જેમાં અધિકારીઓ-પદાધિકારીઓ અને નાગરિકો જોડાયાં હતાં. ’સેવાના રંગ, રાષ્ટ્રના રંગ’ અંતર્ગત જિલ્લાકક્ષાની સામૂહિક રંગોળી સ્પર્ધામાં પ્રથમ ક્રમે વિજેતા વિદ્યાર્થીઓને રૂ.15,000 અને દ્વિતિય ક્રમે વિજેતાને રૂ.10,000 અને વ્યક્તિગત રંગોળી સ્પર્ધામાં પ્રથમ ક્રમે વિજેતા વિદ્યાર્થીને રૂ.5,000 અને દ્વિતિય ક્રમે વિજેતાને રૂ.3000નું પ્રોત્સાહક ઈનામ અને પ્રમાણપત્ર આપી પુરસ્કૃત કરવામાં આવ્યા હતાં. વડાપ્રધાનએ દિલ્હીથી તા. 07 ઓક્ટોબર, 2001ના રોજ ગુજરાતના મુખ્યમંત્રી તરીકે લીધેલા શપથ થી વડાપ્રધાન બનવા સુધીની સફર વર્ણવી ’મેક ઈન ઈન્ડિયા’, ’ચંદ્રયાન’, ’કોરોનાકાળ’, ’યોગ કર્મશુ કૌશલમ્’ સહિતના મુદ્દાઓને આવરી લઈ દેશભરના નાગરિકોને સંબોધન કર્યું હતું. જેનું જીવંત પ્રસારણ સભાસ્થળ ખાતે કરવામાં આવ્યું હતું. મંત્રી, મહાનુભાવો અને ઉપસ્થિત નાગરિકો દ્વારા વર્ષ 2047 સુધીમાં સક્ષમ અને સમૃદ્ધ રાષ્ટ્રના નિર્માણ અર્થે ’વિકસિત ભારત2047’નો સામૂહિક સંકલ્પ લેવામાં આવ્યો હતો. ‘વિકસિત ભારત સંકલ્પ સભા’માં જિલ્લા પંચાયત પ્રમુખ દ્વારકાદાસ દોમડિયા, ધારાસભ્ય સવ ભગવાનભાઈ બારડ, કાળુભાઈ રાઠોડ, જિલ્લા પંચાયતના કારોબારી ચેરમેન મહેન્દ્રભાઈ પીઠિયા, વેરાવળ-પાટણ સંયુક્ત નગરપાલિકાના પ્રમુખ નરેશભાઈ ગોહેલ, તાલુકા પંચાયત પ્રમુખશ્રીઓ, પૂર્વ મંત્રી જશાભાઈ બારડ, ગોવિંદભાઈ પરમાર, અગ્રણી ડો.સંજયભાઈ પરમાર, ઝવેરીભાઈ ઠક્કર, રાજશીભાઈ જોટવા, કલેક્ટર જીતેન્દ્રસિંહ વાઘેલા, જિલ્લા વિકાસ અધિકારી સ્નેહલ ભાપકર, જિલ્લા પોલીસવડા જયદિપસિંહ જાડેજા સહિત અધિકારીઓ-પદાધિકારીઓ અને નાગરિકો ઉપસ્થિત રહ્યાં હતાં.
