‘ફુકરે’ ફિલ્મમાં ધમાલ મચાવ્યા બાદ બોલિવૂડની લોકપ્રિય જોડી રિચા ચઢ્ઢા અને અલી ફઝલ ફરી એકવાર મોટા પડદા પર ધૂમ મચાવવા તૈયાર છે. જોકે, આ વખતે તેઓ વિરોધી પાત્રમાં નહીં, પરંતુ એક કમ્પ્લીટ સિચ્યુએશનલ કોમેડી ફિલ્મમાં મુખ્ય ભૂમિકામાં સાથે જોવા મળશે. સીનવર્ક પ્રોડક્શન્સ અને ગિરિરાજ પ્રોડક્શન્સ દ્વારા આ અનટાઇટલ્ડ ફિલ્મનું નિર્માણ થઈ રહ્યું છે, જેમાં પાવરહાઉસ એક્ટર કુમુદ મિશ્રા પણ મહત્વના રોલમાં નજર આવશે.
આ ફિલ્મની વાર્તા દિલ્હી શહેરની આસપાસ વણાયેલી છે. પ્રખ્યાત કલાકાર અને દિગ્દર્શક શશી વર્મા આ મૂવીનું ડાયરેક્શન કરશે, જેઓ અગાઉ ‘બાલા’ અને ‘કથલ’ જેવી ફિલ્મોમાં પોતાની એક્ટિંગ અને ડાયરેક્શનનો હુનર બતાવી ચૂક્યા છે. તેમની આ ફિલ્મમાં પણ સામાજિક સંદેશની સાથે-સાથે ભરપૂર કોમેડી અને ઈમોશન્સનો તડકો જોવા મળશે.
- શૂટિંગ ક્યારે શરૂ થશે?: વર્ષ 2026ના સેકન્ડ હાફમાં (બીજા ભાગમાં).
- થિયેટર રીલીઝ: એપ્રિલ 2027.
શું કહ્યું સ્ટાર કાસ્ટે?
અલી ફઝલ: “આ સ્ક્રિપ્ટ વાંચતાની સાથે જ મને ગમી ગઈ હતી. રીચા સાથે સ્ક્રીન પર તદ્દન નવી કેમિસ્ટ્રી શેર કરવી એ મારા માટે ખૂબ જ રોમાંચક છે. હું લાંબા સમયથી શશી સર સાથે કામ કરવા માંગતો હતો.”
રિચા ચઢ્ઢા: “વાર્તા ખૂબ જ સરળ અને દિલને સ્પર્શી જાય તેવી છે. અમે ‘ફુકરે’માં સાથે હતા પણ ત્યાં અમારા પાત્રો દુશ્મન જેવા હતા, જ્યારે આ ફિલ્મમાં દર્શકો અમને બિલકુલ અલગ અંદાજમાં જોશે. આ વાર્તા સાંભળીને મને દિલ્હીમાં વિતાવેલા મારા સ્કૂલના દિવસો યાદ આવી ગયા.”
ડિરેક્ટર શશી વર્મા: “આ વાર્તા સંબંધો અને સામાજિક દ્રષ્ટિકોણને રમુજી અંદાજમાં રજૂ કરે છે. દિલ્હી પોતે આ ફિલ્મમાં એક મહત્વના પાત્ર તરીકે ઉભરી આવશે.”
