લોકઅપમાં ન રાખવા અને જામીન માટે માંગી હતી લાંચ
રાજકોટ શહેરમાં ભ્રષ્ટાચાર વિરોધી બ્યુરો (એ.સી.બી.) દ્વારા એક સફળ ટ્રેપ ગોઠવીને લાંચિયા પોલીસ કર્મચારીઓ સામે કડક કાર્યવાહી કરવામાં આવી છે. આજી ડેમ પોલીસ સ્ટેશનમાં ફરીયાદી વિરુદ્ધ એક ગુનો નોંધાયેલ હતો, જેની તપાસ આજી ડેમ પોલીસ ચોકીના એ.એસ.આઈ. રાજેશભાઇ ઉર્ફે રાજૂભાઇ સામતભાઇ મેર (ઉં.વ.53) કરી રહ્યા હતા. આ કેસની તપાસ દરમિયાન ફરીયાદીને પોલીસ લોકઅપમાં ન રાખવા તેમજ જામીનની કાર્યવાહી ઝડપથી પતાવી આપવાના બદલામાં એ.એસ.આઈ. રાજેશભાઇ મેરે રૂ. 10,000ની લાંચની માંગણી કરી હતી. આ લાંચની રકમ આજી ડેમ પોલીસ ચોકીમાં જ ફરજ બજાવતા જી.આર.ડી. જવાન મનોજભાઇ બાબુભાઇ ચૌહાણ (ઉં.વ.31)ને સોંપી દેવા માટે જણાવવામાં આવ્યું હતું. ફરિયાદી પોતે એક જાગૃત નાગરિક હોવાથી અને અન્યાયી રીતે લાંચની રકમ આપવા માંગતા ન હોવાથી, તેમણે તુરંત જ એ.સી.બી.ના ટોલ ફ્રી નંબર 1064 પર સંપર્ક સાધી સમગ્ર ઘટના અંગે વિગતવાર ફરિયાદ નોંધાવી હતી. ફરિયાદના આધારે એ.સી.બી.ની ટુકડી દ્વારા તાત્કાલિક લાંચના છટકાનું આયોજન કરવામાં આવ્યું હતું. યોજના મુજબ, તા. 20/09/2026ના રોજ આજી ડેમ પોલીસ ચોકીના ગેટની સામે આવેલ ટ્રાફીક ભવન પૂર્વ વિભાગના કેમ્પસમાં ટ્રેપ ગોઠવવામાં આવી હતી. આ દરમિયાન ફરિયાદી પાસેથી જી.આર.ડી. જવાન મનોજભાઇ ચૌહાણે રૂ. 10,000ની લાંચની રકમ સ્થળ પર સ્વીકારી હતી. જી.આર.ડી. જવાને લાંચની રકમ સ્વીકારતા જ પૂર્વ આયોજિત છટકા મુજબ એ.સી.બી.ની ટીમે દરોડો પાડીને સ્થળ પર જ બંને આરોપીઓને રંગેહાથ ઝડપી લીધા હતા. આરોપીઓ પાસેથી લાંચની પૂરેપૂરી રકમ રૂ. 10,000 સહીસલામત રીકવર કરી લેવામાં આવી છે અને તેમની સામે ગુનો નોંધી કાયદેસરની અટકાયત કરવામાં આવી છે. આ સમગ્ર સફળ ઓપરેશન રાજકોટ ગ્રામ્ય એ.સી.બી. પોલીસ સ્ટેશનના પોલીસ ઇન્સ્પેક્ટર એમ.એન.રાણા અને તેમની ટીમ દ્વારા પાર પાડવામાં આવ્યું હતું. જાગૃત નાગરિકની હિંમત અને એ.સી.બી.ની ત્વરિત કાર્યવાહીના કારણે લાંચિયા કર્મચારીઓ સામે કડક દાખલો બેસાડવામાં આવ્યો છે.
