ખંભાળિયાની સરકારી હોસ્પિટલને મળ્યા ત્રણ રાષ્ટ્રીય પ્રમાણપત્ર

જય હિન્દ 0 View

ખંભાળિયામાં આવેલી દેવભૂમિ દ્વારકા જિલ્લાની સરકારી સિવિલ હોસ્પિટલએ ભારત સરકારના સ્ટાન્ડર્ડ મુજબ 93 ટકા સાથે એન. ક્યુ.એ.એસ. , મુસ્કાન અને લક્ષ્ય જેવા ત્રણ મહત્વપૂર્ણ રાષ્ટ્રીય કક્ષાએ માન્યતાઓ પ્રાપ્ત પ્રમાણપત્રો મેળવનાર અત્યારની ગુજરાતની પ્રથમ જિલ્લા હોસ્પિટલ બનવાનું ગૌરવ પ્રાપ્ત કર્યું છે.
ખંભાળિયાની જિલ્લા હોસ્પિટલ અંગે સી.ડી.એમ.ઓ. ડો. એલ.એન. કનારાએ જણાવ્યું હતું કે, ખંભાળિયાની જિલ્લા હોસ્પિટલએ નોંધપાત્ર કહી શકાય તે 93 ટકા સાથે નેશનલ ક્વોલિટી એશ્યોરન્સ સ્ટાન્ડર્ડ, મુસ્કાન તથા લક્ષ્ય પ્રમાણપત્ર પ્રાપ્ત થતા આપણા સૌ માટે ગૌરવપૂર્ણ સિદ્ધિ છે. નેશનલ ક્વોલિટી એશ્યોરન્સ સ્ટાન્ડર્ડએ ભારત સરકારના આરોગ્ય અને પરિવાર કલ્યાણ મંત્રાલય દ્વારા જાહેર આરોગ્ય સંસ્થાઓ જેવી કે જિલ્લા હોસ્પિટલ, સીએચસી , પીએચસી , આયુષ્માન આરોગ્ય મંદિરમાં આરોગ્યની સેવાઓની ગુણવત્તા સુનિશ્ચિત પ્રાપ્ત કરવા માટેનો રાષ્ટ્રીય ગુણવત્તા માપદંડ છે. જ્યારે મુસ્કાનએ જન્મથી 12 વર્ષ સુધીના બાળકો માટે સરકારી આરોગ્ય સંસ્થાઓમાં ગુણવત્તાયુક્ત આરોગ્ય સેવાઓ સુનિશ્ચિત કરવાનો છે. ઉપરાંત, લક્ષ્ય લેબર રૂમ ક્વોલિટી ઇમ્પ્રોવમેન્ટ ઈનિસિયેટીવનો મુખ્ય ઉદેશ્ય પ્રસૂતિ દરમ્યાન માતા અને નવજાત શિશુને ઉચ્ચ ગુણવતાની સારવાર તથા લેબર રૂમની ગુણવત્તા સુધારો કરવા માટેનો માપદંડ છે.
આ જિલ્લા હોસ્પિટલએ પ્રાપ્ત કરેલી ઉત્કૃષ્ટ કામગીરી પરિણામે રાષ્ટ્રીય કક્ષાની સિદ્ધિ હાંસલ થવા પામી છે જેના બદલ અધિકારીઓ તથા કર્મયોગીઓને જિલ્લા કલેકટર રાજેશ તન્નાએ અભિનંદન પાઠવ્યા હતા.
અત્રે ઉલ્લેખનીય છે કે, ભારત સરકારના માર્ગદર્શિકા મુજબ દર્દીઓને ગુણવત્તાયુક્ત આરોગ્ય સેવાઓ, સ્વચ્છતા, દર્દી પ્રત્યેનો સંવેદનશીલ વ્યવહાર, આધુનિક ટેક્નોલોજી આધારિત સેવાઓ અને સતત ગુણવત્તા સુધારણાના પ્રયત્નોના પરિણામે આ પ્રતિષ્ઠિત પ્રમાણપત્ર પ્રાપ્ત થયું છે.

રિલેટેડ ન્યૂઝ