મધ્યપ્રદેશમાં ગમખ્વાર અકસ્માત: ટ્રકની પાછળ કાર ઘૂસી જતાં 5 યુવકોના મોત

જય હિન્દ 1 View

મધ્યપ્રદેશનાં મૈહર જિલ્લામાં નેશનલ હાઈવે-30 પર મોડી રાત્રે એક ભયાનક માર્ગ અકસ્માત સર્જાયો હતો. રીગરા ગામ નજીક પૂરપાટ ઝડપે આવી રહેલી એક એસયુવી કાર આગળ ચાલતાં ટ્રકની પાછળ ધડાકાભેર ઘૂસી ગઈ હતી. ટક્કર એટલી પ્રચંડ હતી કે કારનો આગળનો ભાગ કચડાઈ જતાં તેમાં સવાર 5 યુવકોના ઘટનાસ્થળે જ કમકમાટીભર્યા મોત નીપજ્યા હતા, જ્યારે એક યુવક ગંભીર રીતે ઘાયલ થયો હતો. પ્રાથમિક તપાસ મુજબ, આ તમામ મિત્રો અમરપાટન જનપદ ઉપાધ્યક્ષ મનોજ પટેલનાં જન્મદિવસની ઉજવણી કરીને પરત ફરી રહ્યાં હતાં ત્યારે આ અકસ્માત નડ્યો હતો. અકસ્માતની જાણ થતાં જ પોલીસે ઘટનાસ્થળે પહોંચી ભારે જહેમત બાદ કારમાંથી મૃતદેહો અને ઘાયલ યુવકને બહાર કાઢ્યાં હતાં. આ દુર્ઘટનામાં જાન ગુમાવનારા તમામ યુવકો પૂર્વ ધારાસભ્ય લાલજીભાઈ પટેલ અને દિવંગત પૂર્વ કોંગ્રેસ ધારાસભ્ય મથુરા પટેલનાં પરિવારનાં સભ્યો હતાં, જેમાં બે સગા ભાઈઓ પણ સામેલ છે. ગંભીર રીતે ઘાયલ ઓમ પટેલ નામનાં યુવકને વધુ સારવાર માટે જબલપુર રેફર કરાયો છે. ટ્રક ચાલકના જણાવ્યા અનુસાર, કારની સ્પીડ ખૂબ જ વધારે હોવાથી ચાલકે નિયંત્રણ ગુમાવ્યું હતું. પોલીસે હાલ અકસ્માતનો ગુનો નોંધીને વધુ તપાસ હાથ ધરી છે.

રિલેટેડ ન્યૂઝ